धमकावत घराबाहेर नेत, ५० वेळा केला अत्याचार; अल्पवयीन पीडितेची धक्कादायक माहिती
छत्रपती संभाजीनगर : रात्री अपरात्री त्या नराधमांनी मला धमकावून घराबाहेर बोलावले. निर्मनुष्य ठिकाणी नेत ४० ते ५० वेळा अत्याचार केले, अशी धक्कादायक माहिती १४ वर्षीय पीडितेने दिली. वैद्यकीय तपासणीदरम्यान तिने ही माहिती दिली. दरम्यान, अत्याचारात वापरलेली कारदेखील सातारा पोलिसांनी जप्त केली आहे.
इंग्रजी माध्यमाच्या शाळेत नवव्या इयत्तेत शिकणाऱ्या १४ वर्षीय पूर्वावर (नाव काल्पनिक आहे) सहा जणांनी ऑक्टाेबर २०२२ ते मे २०२३ दरम्यान अत्याचार केले. सुरुवातीला विश्वासू मित्राने अत्याचार करून त्याचे मोबाइलमध्ये चित्रण केले. ते व्हायरल करण्याची धमकी देत नात्यातील एका तरुणासह अन्य मित्रांना या क्रूर कृत्यात सहभागी करून घेतले. जवळपास सहा महिने दोन अल्पवयीन मुलांसह सहा मित्रांनी मिळून तिच्यावर बलात्कार केला. तिला गुुंगी येईपर्यंत नशिली पदार्थांचे सेवन करायला लावले. यात सातारा पोलिसांनी अक्षय चव्हाण (१९, रा. डोणगाव तांडा, ता. पैठण), शेख लतिफ ऊर्फ असीम पठाण (२४, रा. देवळाई) व रामेश्वर गायकवाड (२२, रा. आलोकनगर) यांना अटक केली, तर अल्पवयीन आरोपींची बालगृहात रवानगी केली.
सध्या शासकीय बालगृहात असलेल्या पीडितेचा पोलिस जबाब नोंदवत आहेत. सूत्रांनी दिलेल्या माहितीनुसार, मेडिकल तपासणीदरम्यान तिने अनेक धक्कादायक बाबी सांगितल्या. तिच्यावर सहा नराधमांनी ४० ते ५० वेळा अत्याचार केल्याचे तिने सांगितले. पोलिस आता त्या दृष्टीने तांत्रिक पुरावे गोळा करत आहेत. तिने सांगितलेल्या सर्व ठिकाणांवर पोलिसांनी पाहणीदेखील केली. या गुन्ह्यात अक्षय त्याची कार वापरत होता. पोलिस निरीक्षक प्रशांत पोतदार यांनी त्याच्या गावातून कार जप्त केली. देवळाईतील लतिफचा मित्र अद्याप फरार असून पोलिसांचे एक पथक जिल्ह्याबाहेर त्याचा शोध घेत आहेत.
