अनेक घरे जमीनदोस्त, ३६ जणांचा मृत्यू,गाड्याही रद्द… रेमल चक्रीवादळाने या राज्यांमध्ये केला आहे कहर
रेमल चक्रीवादळाच्या प्रभावामुळे मंगळवारी पूर्वेकडील चार राज्यांमध्ये अतिवृष्टी आणि भूस्खलनात किमान 36 जणांचा मृत्यू झाला. त्यामुळे आठ राज्यांमध्ये जनजीवन विस्कळीत झाले असून रस्ते-रेल्वे संपर्क प्रभावित झाला आहे.
अनेक गाड्या रद्द करण्यात आल्या
ईशान्य फ्रंटियर रेल्वेच्या लुमडिंग विभागांतर्गत न्यू हाफलांग-जटिंगा लमपूर विभाग आणि डिटोकचेरा यार्ड दरम्यान पाणी साचल्यामुळे अनेक गाड्या रद्द करण्यात आल्या आहेत. तसेच त्यांच्या वेळाही बदलण्यात आल्या.
आपत्ती व्यवस्थापन आणि पोलिस अधिकाऱ्यांनी सांगितले की, आयझॉलमधील मेल्थम आणि हिलिमेन दरम्यानच्या खाणीच्या जागेवरून आतापर्यंत 21 मृतदेह बाहेर काढण्यात आले आहेत, तर सकाळी कोसळल्यानंतरही अनेक जण ढिगाऱ्याखाली अडकले आहेत. जिल्ह्यातील सालेम, आयबोक, लुंगसेई, केलसिह आणि फाल्कन येथे भूस्खलनामुळे सहा जणांचा मृत्यू झाला असून अनेक जण बेपत्ता आहेत.
राज्यातील विविध भागात 40 हून अधिक घरांचे नुकसान झाले आहे
नागालँडमध्ये वेगवेगळ्या घटनांमध्ये किमान चार जण ठार झाले, तर राज्याच्या विविध भागात 40 हून अधिक घरांचे नुकसान झाले. दरम्यान, आसाममध्ये कामरूप, कामरूप (मेट्रो) आणि मोरीगाव जिल्ह्यात तीन जणांचा मृत्यू झाला तर 17 जण जखमी झाले. आसाम राज्य आपत्ती व्यवस्थापन प्राधिकरण (ASDMA) च्या म्हणण्यानुसार, सोनितपूर जिल्ह्यातील ढेकियाजुली येथे एका स्कूल बसवर झाडाची फांदी पडल्याने 12 विद्यार्थी जखमी झाले.
मुख्यमंत्री हिमंता बिस्वा सरमा यांनी शोक व्यक्त केला
मोरीगाव येथे वेगवेगळ्या घटनांमध्ये पाच जण जखमी झाले. मुख्यमंत्री हिमंता बिस्वा सरमा यांनी जीवित आणि मालमत्तेच्या हानीबद्दल शोक व्यक्त केला. संततधार पावसामुळे 17 गावांतील घरांचे मोठ्या प्रमाणात नुकसान झाले आहे. त्रिपुरामध्ये गेल्या 24 तासांत राज्याच्या बहुतांश भागात 50 ते 60 किमी प्रति तास वेगाने वाऱ्यासह मुसळधार पाऊस पडला, ज्यामुळे 470 घरांचे नुकसान झाले आणि 750 लोकांना वेगवेगळ्या जिल्ह्यांतील 15 मदत शिबिरांमध्ये आश्रय घ्यावा लागला.
भारतीय हवामान खात्याने (IMD) अरुणाचल प्रदेशात अतिमुसळधार पावसाचा अंदाज व्यक्त करत हाय अलर्ट जारी केला आहे. मुख्यमंत्री पेमा खांडू यांनी लोकांना सर्व खबरदारीचे उपाय करावेत आणि संवेदनशील आणि वेगळ्या ठिकाणी जाणे टाळावे अशी विनंती केली आहे.
