मूळचा बीडचा असलेला एक तरुण गेल्या 35 वर्षांपासून पुण्यात होता. काही दिवसांपूर्वी या तरुणाने पत्रकार परिषद घेतली अन् सत्ताधारी पक्षातील आमदारावर गंभीर आरोप केले.
मुख्यमंत्र्यांनी संबंधित आमदाराचा राजीनामा घेऊन कायदेशीर कारवाई करावी, नाहीतर 26 मार्चला आत्मदहन करेन, असा इशारा दिला होता. मात्र, 25 मार्च रोजी तरुणाच्या पत्नीला फोन आला अन् माझं अपहरण झालंय, असं तरुणाने स्वत: पत्नीला सांगितलं. घाबरलेल्या पत्नीने पोलिसांना तातडीने याची माहिती दिली अन् पोलीस कामाला लागले. तरुणाच्या अपहरणानंतर पोलिसांची देखील भंबेरी उडाली.
शेवटचे मोबाईल लोकेशन शोधलं अन्…
काही लोक मला घेऊन चाललेत, अशी माहिती तरुणाने पत्नीला दिला अन् नंतर त्याचा फोन बंद लागला. तरुणाच्या पत्नीने वारजे माळवाडी पोलिसांची मदत घेतली अन् पत्रकार परिषदेची घटना सांगितली. प्रकरण मोठं वाटत असल्याने पोलिसांनी तातडीने तपास सुरू केला. तरुणाचं शेवटचे मोबाईल लोकेशन दुपारी 1 वाजून 49 मिनिटांनी गहुंजे येथे दिसलं. पोलिसांनी गहुंजे येथे शोधाशोध केली पण हाती काही लागलं नाही. अखेर मध्यरात्रीनंतर संबंधित तरुण शिरगाव पोलिस ठाण्याच्या हद्दीतील एका लॉजमध्ये सापडला. त्यावेळी पोलिसांनी जे काही ऐकलं ते पाहून पोलिसांचं डोकं चक्रावलं. .
तरुणाची लॉजवरून सुटका
पोलिसांनी तरुणाची लॉजवरून सुटका केली. तरुणाला पोलीस चौकीत आणण्यात आलं आणि नेमकं काय झालं होतं? असा सवाल केला. त्यावेळी या तरुणाने अपहरणाचा बनाव रचला होता, असं पोलिसांच्या लक्षात आलं. तरुणाने अपहरणाचा बनाव रचला होता, असं वारजे माळवाडी पोलिस ठाण्याचे वरिष्ठ निरीक्षक विश्वजित काइंगडे यांनी दिली.
पुणे पोलिसांची डोकेदुखी वाढली
दरम्यान, पैशांची मागणी किंवा अन्य कारणांसाठी अपहरण झाल्याचा बनाव करणाऱ्यांमुळे पुणे पोलिसांची डोकेदुखी वाढली आहे. पोलिसांचा वेळ वाया घालवणाऱ्या आणि खोट्या तक्रारी करणाऱ्यांवर पोलिसांनी संबंधितांवर गुन्हे दाखल करून, तातडीने आरोपपत्रही दाखल करण्याची भूमिका घेतली आहे.
